Kryeministri Edi Rama do të kryesojë delegacionin zyrtar shqiptar në konferencën ndërqeveritare me BE, më 14 korrik, ku do të zyrtarizohet mbyllja e 3 kapitujve të parë të negociatave. Brukseli konfirmoi zyrtarisht mbrëmjen e 14 korrikut, duke shënuar një moment shumë të rëndësishëm në diplomaci; nisjen e mbylljes së kapitujve që do të duhet të vijojë sipas parashikimeve deri në vitin 2027.
Konferenca parashikohet të nisë rreth orës 19:00 në Këshillin e Europës, ku kryeministri Edi Rama parashikohet të ketë një fjalë para përfaqësuesve të shteteve anëtare, bashkë me ministrin e Jashtëm të Irlandës dhe komisioneren Marta Kos, dhe më pas negociohet mbyllja e tri kapitujve: Kapitulli 26 “Arsimi dhe kultura”; Kapitulli 25 “Kërkimi shkencor”; Kapitulli 30 “Marrëdhëniet me Jashtë”. Në mbyllje parashikohet edhe një konferencë për shtyp rreth orës 20:00. Tre kapitujt e parë po mbyllen gjatë presidencës së Irlandës, vendi që kryeson BE-në deri më 31 dhjetor të këtij viti.
Kryeministri Edi Rama më herët ka deklaruar se agjenda europiane është e dakordësuar me BE-në dhe parashikimet janë që brenda dekadës, vendet anëtare të ratifikojnë në parlamentet e tyre aderimin e Shqipërisë në union.
Ndërsa më herët, më 13 korrik, kryeministri Rama do të jetë në Paris, me ftesë të Emmanuel Macron, në një darkë pune me vullnetarët e Ukrainës dhe mëngjesin e 14 korrikut në Paradën Ushtarake.