Një specie e re dinosauri gjigant është zbuluar nga paleontologët në Tajlandë, në një zbulim që po konsiderohet i rëndësishëm për studimin e dinosaurëve me qafë të gjatë.
Fosilet u gjetën në provincën Kalasin, në verilindje të vendit, dhe i përkasin një dinosauri barngrënës të quajtur “Uragasaurus kalasinensis”, i cili besohet se ka jetuar rreth 150 milionë vjet më parë, gjatë periudhës së Jurasikut të Vonë.
Sipas studiuesve, ky dinosaur arrinte një gjatësi prej rreth 20 metrash dhe dallohej për qafën e tij jashtëzakonisht të gjatë, të cilën e përdorte për të arritur bimësinë në lartësi të ndryshme.
Fosili kryesor që çoi në identifikimin e species së re ishte një rruazë e shtyllës kurrizore, e cila paraqiste karakteristika të panjohura më parë. Përmes skanimeve me tomografi kompjuterike (CT), shkencëtarët përcaktuan se dinosauri i përkiste familjes Mamenchisauridae, një grup dinosaurësh gjigantë me qafë të zgjatur.
Zbulimi është veçanërisht i rëndësishëm pasi shumica e fosileve të kësaj familjeje janë gjetur deri tani në Kinë. Ky është rasti i parë i identifikimit të një dinosauri të këtij grupi në Tajlandë.
Sipas autorit kryesor të studimit, Dr. Apirat Nilphanaphan nga Universiteti Mahasarakham, fosili është pjesë e një koleksioni të madh të zbuluar në zonën Phu Noi, një vend paleontologjik i identifikuar për herë të parë në vitin 2008.
Gjatë gërmimeve në këtë zonë janë zbuluar dhëmbë, kocka dhe fosile të shumta dinosaurësh, ku më shumë se 90% e materialit të nxjerrë i përket këtyre krijesave prehistorike.
Studiuesit theksojnë se Uragasaurus kalasinensis kishte disa veçori unike anatomike, përfshirë struktura kockore në formë “Y” dhe një sistem zgavrash ajri brenda kockave, të cilat nuk janë vërejtur te dinosaurë të tjerë të njohur deri më sot.
“Pikërisht këto karakteristika e dallojnë si një specie të re”, u shpreh Dr. Nilphanaphan.
Studimi është publikuar në revistën prestigjioze shkencore “Nature”.
Ky zbulim vjen pas një tjetër gjetjeje të rëndësishme në Tajlandë, ku në muajin maj shkencëtarët njoftuan identifikimin e “Nagatitan”, një tjetër dinosaur barngrënës me qafë të gjatë, i konsideruar ndër më të mëdhenjtë e zbuluar ndonjëherë në Azinë Juglindore. Ai vlerësohet të ketë pasur një gjatësi prej rreth 27 metrash dhe peshë afërsisht 27 tonë.