Shqipëria pritet të shënojë një tjetër moment të rëndësishëm në rrugëtimin drejt anëtarësimit në Bashkimin Evropian. Më 14 korrik, në Bruksel, do të zhvillohet Konferenca e IX Ndërqeveritare Shqipëri–BE, ku parashikohet mbyllja e tre kapitujve të parë të negociatave të anëtarësimit.
Lajmi u bë i ditur nga kryeministri Edi Rama, i cili, përmes një reagimi në rrjetet sociale, njoftoi se konferenca do të mbahet në selinë e Këshillit të Bashkimit Evropian. Sipas tij, ky zhvillim konfirmon vijimin e procesit të integrimit evropian të Shqipërisë dhe progresin e arritur në negociata.
Në reagimin e tij, Rama ironizoi deklaratat e opozitës, e cila sipas tij kishte parashikuar bllokimin e negociatave dhe dështimin e procesit të integrimit.
“Shqipëria nuk ndalet. Thanë negociatat u bllokuan, thanë Samiti i NATO-s u anulua, thanë qeveria u rrëzua, thanë ç’nuk thanë e gjë pa thënë s’do lënë, sepse puna e tyre janë llafet, ndërsa fjala jonë është puna”, shkroi kryeministri.
Konferenca e 14 korrikut vjen pas një serie takimesh ndërqeveritare që kanë shënuar avancimin e negociatave të Shqipërisë me Bashkimin Evropian. Pas hapjes zyrtare të negociatave në korrik të vitit 2022, gjatë viteve 2024–2026 janë hapur të gjithë grup-kapitujt negociues.
Në Konferencën e VIII Ndërqeveritare, të mbajtur më 26 maj 2026, Shqipëria hyri zyrtarisht në fazën e mbylljes së negociatave, pasi Bashkimi Evropian konfirmoi përmbushjen e kushteve të ndërmjetme për grup-kapitullin “Themeloret”.
Mbyllja e tre kapitujve të parë përbën një hap të rëndësishëm në procesin e negociatave, por nuk nënkupton përfundimin e tij. Anëtarësimi i plotë në Bashkimin Evropian do të realizohet vetëm pasi të jenë mbyllur të gjithë kapitujt negociues dhe Traktati i Anëtarësimit të ratifikohet nga të gjitha shtetet anëtare të BE-së.