Drejtoria e Përgjithshme e Tatimeve po vijon zbatimin e procesit të fshirjes automatike të detyrimeve tatimore për subjektet që përfitojnë nga Ligji “Për fshirjen, shuarjen dhe pagesën e detyrimeve tatimore”.
Sipas të dhënave të publikuara nga administrata tatimore, deri më tani janë fshirë ose shuar detyrime me një vlerë totale prej 313 milionë eurosh, duke përfshirë 121 630 tatimpagues. Procesi do të vazhdojë edhe për të gjithë subjektet e tjera që plotësojnë kriteret e parashikuara në ligj.
Ligji parashikon lehtësime për detyrimet tatimore të papaguara ndaj administratës tatimore qendrore dhe vendore, si edhe për disa detyrime të caktuara që paguhen pranë administratës doganore. Qëllimi i kësaj skeme është pastrimi i llogarive tatimore dhe lehtësimi i barrës financiare për subjektet përfituese.
Administrata Tatimore bën me dije se zbatimi i këtij procesi po vijon sipas procedurave të përcaktuara në ligj, ndërsa tatimpaguesit po njoftohen në mënyrë të vazhdueshme përmes kanaleve elektronike të administratës.
