Gjykata Kushtetuese ka marrë një tjetër vendim në lidhje me çështjen e kryebashkiakut të Tiranës, Erion Veliaj, duke shfuqizuar vendimin e Gjykatës së Lartë për vazhdimin e paraburgimit të tij dhe duke e kthyer dosjen për rishqyrtim.
Sipas vendimit të Kushtetueses, Gjykata e Lartë nuk ka kryer një shqyrtim të plotë kushtetues mbi nevojën dhe proporcionalitetin e masës së sigurisë, nuk ka vlerësuar alternativa më pak kufizuese dhe nuk ka analizuar ndikimin që paraburgimi ka në ushtrimin e mandatit të një kryebashkiaku të zgjedhur me votë.
Gjykata vlerësoi gjithashtu se nuk janë trajtuar në mënyrë të plotë pretendimet kushtetuese të paraqitura nga mbrojtja lidhur me procesin gjyqësor.
Në vendim përfshihet edhe një mendim paralel i një prej gjyqtarëve kushtetues, i cili argumenton se provat e paraqitura nuk arrijnë standardin kushtetues të “dyshimit të arsyeshëm” për të justifikuar paraburgimin. Sipas këtij gjyqtari, faktet e paraqitura nga prokuroria lidhen me ushtrimin normal të detyrës së kryebashkiakut dhe nuk do të bindnin një vëzhgues objektiv për ekzistencën e veprave penale të pretenduara.
Në opinionet shoqëruese janë ngritur gjithashtu shqetësime për mënyrën e trajtimit të Veliajt gjatë proceseve gjyqësore, duke përfshirë përdorimin e kafazit prej xhami në sallën e gjyqit, kufizimet në komunikimin me mbrojtësit dhe nevojën për mbrojtjen e prezumimit të pafajësisë dhe të drejtës për një mbrojtje efektive.
Pas publikimit të vendimit, këshilltarët ligjorë ndërkombëtarë të Veliajt, firmat Kasowitz dhe Mishcon de Reya, kërkuan zbatimin e shpejtë të tij. Në një deklaratë, partneri i Kasowitz, Daniel J. Fetterman, e cilësoi vendimin si një riafirmim të rëndësishëm të parimeve kushtetuese dhe shprehu pritshmërinë që, pas rishqyrtimit nga Gjykata e Lartë, të arrihet në përfundimin se vazhdimi i paraburgimit nuk mund të justifikohet nga pikëpamja kushtetuese.
Fetterman deklaroi gjithashtu se çështja ngre shqetësime më të gjera mbi respektimin e standardeve të procesit të rregullt ligjor dhe të Konventës Evropiane për të Drejtat e Njeriut, duke theksuar se zbatimi i garancive kushtetuese është thelbësor për funksionimin e shtetit të së drejtës dhe besimin e publikut te drejtësia.