Drejtuesi Politik i Partisë Socialiste për qarkun e Tiranës, Taulant Balla, zhvilloi një vizitë në Kavajë, ku u ndal në kompaninë familjare “Xhihani”, e cila prej 33 vitesh operon në tregun e pjesëve të këmbimit për mjete të rënda, kamionë, ekskavatorë dhe sektorin e ndërtimit.
Gjatë takimit me drejtuesit dhe punonjësit e kompanisë, Balla vlerësoi kontributin e bizneseve familjare në zhvillimin ekonomik të vendit, duke theksuar se sipërmarrje të tilla krijojnë vende pune dhe nxisin rritjen ekonomike. Aktualisht, kompania punëson rreth 25 persona dhe operon me standarde të larta shërbimi.
“Biznese si ‘Xhihani’ janë prova më e mirë se puna, përkushtimi dhe mbështetja ndaj sipërmarrjes sjellin zhvillim konkret për ekonominë dhe më shumë vende pune”, u shpreh Balla.
Gjatë vizitës, ai deklaroi gjithashtu se gjatë pesë muajve të parë të këtij viti janë regjistruar 10 mijë biznese të reja në Shqipëri, duke e cilësuar këtë si një tregues pozitiv për klimën e sipërmarrjes në vend.