Një ilaç eksperimental i zhvilluar fillimisht për rikuperimin e zemrës pas infarktit mund të hapë rrugë të reja edhe në trajtimin e sëmundjeve kronike të veshkave. Kjo është ajo që sugjerojnë rezultatet e një studimi laboratorik të cituar nga Reuters.
Sipas studiuesve, ilaçi AD-NP1 ka përmirësuar ndjeshëm rigjenerimin e indeve të dëmtuara të veshkave në modelet eksperimentale me minj.
I zhvilluar nga një ekip i Universitetit të Kalifornisë në Los Anxhelos (UCLA), AD-NP1 vepron duke bllokuar proteinën ENPP1, e cila pengon proceset natyrore të riparimit të indeve dhe lidhet me dëmtime të përhershme pas infarktit të zemrës.
Gjatë studimit, shkencëtarët analizuan mostra të indeve nga pacientë me sëmundje kronike të veshkave dhe konstatuan nivele të larta të proteinës ENPP1 në krahasim me indet e shëndetshme.
Eksperimentet treguan se minjtë që nuk prodhonin këtë proteinë, falë modifikimit gjenetik, kishin më pak fibrozë, riparim më të mirë të indeve dhe funksion më të mirë të veshkave pas dëmtimit.
Në një provë tjetër, kafshët e trajtuara me AD-NP1 shfaqën përmirësim të funksionit të veshkave dhe shërim më të shpejtë të indeve vetëm një javë pas trajtimit.
Sipas drejtuesit të studimit, Arjun Deb, proteina ENPP1 pengon mekanizmat biologjikë që u mundësojnë qelizave të prodhojnë energjinë e nevojshme për rigjenerim. Ai theksoi se proceset e zbuluara fillimisht në zemër rezultuan të jenë të ngjashme edhe në veshka.
Aktualisht, AD-NP1 është miratuar për prova pilot te njerëzit për trajtimin e dëmtimeve të zemrës pas infarktit. Megjithatë, përdorimi i tij për sëmundjet kronike të veshkave mbetet ende në fazën paraklinike dhe do të kërkojë studime të mëtejshme klinike për të vlerësuar sigurinë dhe efektivitetin tek pacientët.