Shtetet e Bashkuara festojnë sot 250-vjetorin e shpalljes së Pavarësisë, me aktivitete dhe ceremoni të organizuara në mbarë vendin për të përkujtuar një nga momentet më të rëndësishme në historinë amerikane.
Në Uashington DC, festimet përfshijnë fishekzjarrë, fluturime të avionëve luftarakë dhe një tubim të presidentit Donald Trump, ndërsa në qytete si Nju Jorku, Filadelfia dhe Los Anxhelosi janë planifikuar koncerte dhe aktivitete festive me pjesëmarrjen e artistëve të njohur.
Mesazhin e parë me rastin e kësaj dite e përcolli zëvendëspresidenti JD Vance, i cili gjatë një fjalimi në Nju Jork falënderoi presidentin Donald Trump dhe vlerësoi historinë e vendit.
“Sot festojmë 250 vjet Amerikë, duke u përballur me të ardhmen pa frikë. Festojmë 250 vjet duke treguar se çfarë mund të arrijë një popull i lirë”, deklaroi Vance para marinarëve, efektivëve të policisë, punonjësve të shërbimeve të emergjencës dhe përfaqësuesve të marinave nga vende të ndryshme.
Në fjalën e tij, ai lexoi edhe një pjesë nga Deklarata e Pavarësisë, ku thuhet se të gjithë njerëzit janë krijuar të barabartë dhe gëzojnë të drejta të patjetërsueshme, mes tyre jeta, liria dhe kërkimi i lumturisë.
Megjithatë, festimet në disa zona janë ndikuar nga kushtet atmosferike. Autoritetet meteorologjike kanë paralajmëruar temperatura shumë të larta dhe stuhi në pjesë të lindjes dhe qendrës së SHBA-së, duke detyruar anulimin ose shtyrjen e disa aktiviteteve të planifikuara.
Një ditë më parë, gjatë një fjalimi në malin Rushmore, presidenti Donald Trump e cilësoi 250-vjetorin e Pavarësisë si “një nga ditët më të jashtëzakonshme në historinë e botës”, ndërsa deklaroi se identiteti amerikan po përballet me sfida të reja dhe bëri thirrje për mbrojtjen e vlerave të vendit.