Pasi deklaroi se protestuesit që rrahin policë duhen dëgjuar me vëmendje nga Kuvendi dhe se ajo vetë po punon për platformën e “Shqipërisë së Re”, duket se Elisa Spiropali i ka hyrë punës në terren. Një fotografi e shpërndarë në rrjetet sociale tregon se Spiropali, këto ditë, nuk i është frikësuar as të nxehtit, por ka nisur takimet në kafene me “protestuesit”. Por personi me të cilin po diskuton Elisa Spiropali nuk është dosido.
Të njëjtat burime bëjnë me dije se ai është super-mashtruesi Indrit Aliu, i cili, me gjasë, mund të jetë edhe financues i protestave të fundit.
Indrit Aliu, ose Kolleshi, që shihet me Elisa Spiropalin në një bisedë interesante në këtë foto, pavarësisht se ka ndryshuar emrin në një procedurë të dyshimtë dhe sot quhet David Isaac, mbetet një person me disa vite burg në kurriz dhe me dhjetëra dosje penale për mashtrim e vjedhje. Por ajo çka ngre pikëpyetje të mëdha sot është sesi Elisa Spiropali gjendet gjithmonë e implikuar me personazhe të botës së krimit. Një tërheqje magnetike kjo e kësaj politikaneje, që nuk resht së dhëni leksione për demokracinë, Shqipërinë e Re etj.
Duket se Elisa Spiropali po shkruan platformën që ka premtuar me ndihmën e Indrit Aliut – Kolleshi, ose alias David Isaac, i cili, për të fshehur gjurmët, ka ndryshuar emrin dhe është bërë izraelit. Madje, madje, president i një sinagoge në Sauk.
Kujtojmë se Indrit Aliu (Kolleshi) është arrestuar në vitin 2023, pasi mashtronte biznesmenë duke u prezantuar si zyrtar i lartë dhe u premtonte se do t’u siguronte tendera, licenca dhe zgjidhje pranë institucioneve shtetërore në këmbim të parave.
Mishërim i shprehjes “vesi del me shpirtin”, Aliu ka qenë i dënuar më parë për të njëjtën vepër penale. Ai është arrestuar në vitin 2009 në Greqi, pas kallëzimeve të shumta nga biznesmenë që pretendonin se u kishte zhvatur rreth 4 milionë euro. Si rrjedhojë, ai u ekstradua në Shqipëri, ku u dënua me burg në vitin 2011.
Aliu shquhet se ka gënjyer për moshën, identitetin dhe lidhjet e tij, duke marrë në qafë shumë persona publikë, por edhe duke iu afruar shumë të tjerëve me rëndësi në sferën publike e politike.
Mirëpo, sot pyetja është nëse Spiropali po i kërkon financim për protestën “Shqipëria e Re” apo po i propozon që ta shkruajnë bashkë platformën. Marrë nga Alb Times