Në Komandën e Forcës Ajrore në Rinas u inaugurua këtë të premte Shkolla Kombëtare e Fluturimit, një investim që synon të forcojë kapacitetet e Forcës Ajrore dhe të mbështesë modernizimin e Forcave të Armatosura të Shqipërisë.
Në ceremoninë e hapjes morën pjesë Kryeministri Edi Rama, Ministri i Mbrojtjes Ermal Nufi, drejtues të lartë të Forcave të Armatosura, përfaqësues të vendeve partnere dhe 25 kandidatët e parë që do të ndjekin programin e formimit.
Gjatë fjalës së tij, ministri Ermal Nufi u shpreh se krijimi i kësaj shkolle përfaqëson një hap të rëndësishëm në ndërtimin e kapaciteteve të reja për mbrojtjen dhe sigurinë kombëtare.
“Me këtë investim nuk po inaugurojmë vetëm një institucion arsimor, por po ndërtojmë një kapacitet strategjik që do të kontribuojë në zhvillimin e Forcës Ajrore dhe të burimeve njerëzore të saj”, tha ai.
Sipas ministrit, shkolla do të ofrojë trajnim për pilotë dhe kontrollorë fluturimi sipas metodologjive dhe standardeve të aleatëve të NATO-s, duke kombinuar teknologjinë bashkëkohore me programet më të avancuara të formimit profesional.
Nufi vlerësoi gjithashtu rëndësinë e dy helikopterëve të rinj Bell 505, të cilët tashmë janë pjesë e flotës së Forcës Ajrore dhe do të shërbejnë si mjete kryesore për trajnimin praktik të pilotëve të rinj.
Ai theksoi se investimet në infrastrukturë, teknologji dhe zhvillimin e personelit janë pjesë e një strategjie afatgjatë për të rritur aftësitë mbrojtëse të vendit dhe për ta bërë Shqipërinë një aleate gjithnjë e më të besueshme në kuadër të NATO-s.
Shkolla e re e Fluturimit e nis aktivitetin me 25 kursantët e parë, ndërsa plani parashikon formimin e pesë pilotëve të rinj çdo vit përgjatë pesë viteve të ardhshme. Krahas tyre, do të trajnohet edhe personeli teknik që do të merret me mirëmbajtjen e helikopterëve mësimorë Bell 505.