Nëntë persona janë arrestuar në Kosovë gjatë një operacioni të gjerë të autoriteteve, i cili kishte në shënjestër një grup të dyshuar të strukturuar kriminal.
Sipas njoftimit të Prokurorisë Speciale të Kosovës, operacioni u zhvillua në bashkëpunim me Policinë, Doganën dhe Administratën Tatimore të Kosovës. Të dyshuarit akuzohen se kanë vepruar si grup i strukturuar kriminal, duke paraqitur dokumente të rreme lidhur me tatimet, si edhe duke kryer shitje dhe transaksione fiktive të derivateve të naftës.
Të arrestuarit, të identifikuar me inicialet F.M., F.M., M.M., S.K., N.B., D.M., A.M., N.M. dhe G.Q., dyshohen për disa vepra penale, përfshirë shpëlarjen e parave, kontrabandimin e mallrave në bashkëkryerje, pjesëmarrjen ose organizimin e grupit kriminal të organizuar, falsifikimin e dokumenteve lidhur me tatimet, si dhe shmangien nga tatimi, raportoi Radio Evropa e Lirë.
Gjatë operacionit, i zhvilluar të mërkurën, u kryen kontrolle në 21 lokacione të ndryshme.
Autoritetet sekuestruan pesë autobote për transportin e derivateve të naftës, dokumente, një shumë parash, armë, fishekë, automjete dhe pajisje elektronike, ndërsa nuk kanë dhënë ende detaje të tjera mbi hetimet.