Komanda Qendrore e SHBA-së (CENTCOM) njoftoi se avionë të marinës dhe forcave ajrore goditën sistemet ushtarake të vëzhgimit, sistemet e komunikimit, bazat e mbrojtjes ajrore, depot e dronëve dhe pajisjet për vendosjen e minave detare. Sipas saj, sulmet ishin një kundërpërgjigje ndaj një sulmi iranian me dron vetëshkatërrues ndaj cisternës së naftës M/T Kiku, me flamur panamez, ndërsa ajo po kalonte pranë Ngushticës së Hormuzit.
“Pas sulmeve të SHBA-së të premten, si kundërpërgjigje ndaj sulmit iranian ndaj anijes M/V Ever Lovely, Iranit iu dha mundësia të respektonte marrëveshjen e armëpushimit, por zgjodhi të mos e bënte këtë,” thuhet në deklaratën e CENTCOM.
Komanda amerikane publikoi në rrjetet sociale pamje që më parë nuk ishin të disponueshme për publikun dhe që, sipas saj, tregojnë momentin e sulmeve.
Edhe të premten, SHBA-ja kishte goditur objektiva në Iran pas një tjetër sulmi me dron ndaj anijes M/V Ever Lovely. Sipas CENTCOM, avionët amerikanë shënjestruan depo raketash dhe dronësh, si edhe stacione radarësh bregdetarë.
Në përgjigje, Teherani akuzoi Uashingtonin se kishte shkelur marrëveshjen e mirëkuptimit mes dy vendeve dhe kreu sulme me raketa dhe dronë ndaj objekteve ushtarake amerikane në Bahrein dhe Kuvajt.
Kryetari i Komisionit të Sigurisë Kombëtare në Parlamentin iranian, Ebrahim Azizi, deklaroi të premten se sulmet amerikane tregojnë se presidenti Donald Trump “nuk është i përkushtuar ndaj parimeve të negociatave apo armëpushimit”.
“Kjo shkelje e papërgjegjshme e armëpushimit, si gjithmonë, do t’i detyrojë ata të tërhiqen dhe të pendohen,” shkroi ai në rrjetet sociale.
Përshkallëzimi i ri i situatës hedh dyshime të mëdha mbi marrëveshjen e përkohshme të paqes mes SHBA-së dhe Iranit, e cila u nënshkrua në fillim të këtij muaji.
Sipas marrëveshjes, Washington-i dhe Teherani ishin zotuar të respektonin një armëpushim dhe të garantonin sigurinë detare në Ngushticën e Hormuzit, një nga korridoret më të rëndësishme në botë për transportin e naftës dhe gazit.
Marrëveshja parashikon që SHBA-të të heqin bllokadën detare ndaj Iranit, ndërsa Teherani të rihapë Ngushticën e Hormuzit dhe të konfirmojë sërish se “nuk do të sigurojë dhe as të prodhojë armë bërthamore”. Të dyja palët kanë një afat prej 60 ditësh për të arritur një marrëveshje përfundimtare.