Mes maleve madhështore të Alpeve Shqiptare dhe natyrës së paprekur fshihet një nga destinacionet më spektakolare të vendit, Lumi i Shalës, i cili po tërheq gjithnjë e më shumë turistë nga e gjithë bota.
Në një artikull të publikuar nga media britanike Liverpool Echo, ky destinacion përshkruhet si një “parajsë e fshehur” me ujëra të kristalta dhe peizazhe mbresëlënëse, duke u krahasuar shpesh me Tajlandën. Për këtë arsye, Lumi i Shalës njihet edhe me nofkën “Tajlanda e Evropës”.
I vendosur pranë Parkut Kombëtar të Alpeve Shqiptare, jo larg Thethit, destinacioni është i aksesueshëm kryesisht përmes një udhëtimi me varkë nga Liqeni i Komanit. Vetë lundrimi konsiderohet një pjesë e veçantë e eksperiencës, pasi ofron pamje panoramike të maleve të larta dhe ujërave të qeta.
Vizitorët e kanë vlerësuar Lumin e Shalës si një nga vendet që duhen vizituar patjetër në Shqipëri. Në komentet e publikuara në platformën TripAdvisor, turistët e cilësojnë atë një destinacion ideal për not, relaks dhe eksplorim, larg zonave të mbipopulluara turistike.
Sezoni i vizitave zgjat zakonisht nga muaji maj deri në tetor, ndërsa udhëtimet me varkë organizohen nga operatorë turistikë, me çmime që nisin nga rreth 18 paund për një ekskursion ditor.
Falë promovimit në mediat ndërkombëtare dhe rrjetet sociale, Lumi i Shalës po konsolidohet si një nga perlat e turizmit shqiptar, duke e forcuar imazhin e Shqipërisë si një destinacion gjithnjë e më tërheqës në hartën turistike të Evropës.