Shqipëria dhe Maqedonia e Veriut kanë arritur një marrëveshje ndërkufitare për zbatimin e sistemit “One Stop”, i cili synon të thjeshtojë procedurat e kalimit kufitar dhe të lehtësojë lëvizjen e qytetarëve dhe mallrave mes dy vendeve.
Marrëveshja parashikon që udhëtarët të ndalojnë vetëm një herë në pikat doganore, ku kontrollet do të kryhen nga autoritetet e të dy shteteve në një pikë të vetme.
Zbatimi i sistemit do të nisë brenda këtij muaji në pikën kufitare të Qafë Thanës, ndërsa gjatë muajit të ardhshëm do të shtrihet edhe në pikën doganore të Bllatës.
Sipas të dhënave zyrtare, në pikën kufitare të Bllatës kalojnë mesatarisht rreth 4 600 qytetarë në ditë, ndërsa në pesë muajt e parë të vitit janë regjistruar rreth 300 mijë automjete. Rritja e fluksit lidhet kryesisht me hapjen e Rrugës së Arbrit, e cila ka shkurtuar ndjeshëm kohën e udhëtimit mes dy vendeve.
Autoritetet vlerësojnë se zbatimi i sistemit “One Stop” do të reduktojë pritjet në kufi, do të përshpejtojë procedurat doganore dhe do të forcojë bashkëpunimin ekonomik e tregtar mes Shqipërisë dhe Maqedonisë së Veriut.