SHBA- Shtabi i Përbashkët i Forcave të Armatosura iraniane njoftuan ribllokimin e Ngushticës strategjike të Hormuzit në përgjigje të sulmeve izraelite në Libanin jugor, të cilat shkelin protokollin e marrëveshjes së arritur me Shtetet e Bashkuara.
“Njoftohet se Ngushtica e Hormuzit do të mbyllet për lundrim, kjo masë e parë është një përgjigje ndaj shkeljes së angazhimeve të armikut. Nëse sulmi vazhdon, do të hartohen dhe zbatohen masa të tjera për të bindur armikun të respektojë detyrimet e tij,” thuhej në deklaratën e stafit të transmetuar nga televizioni iranian.
Nga ana tjetër, zëvendëspresidenti i SHBA-së J.D. Vance i tha Fox News se nuk ka asnjë tregues që Ngushtica e Hormuzit është mbyllur, duke iu përgjigjur raporteve iraniane për një përshkallëzim të ri ushtarak pas sulmeve të Izraelit në Liban.
Deklaratat e zëvendëspresidentit të SHBA-së vijnë pas pretendimeve nga Irani se forcat e tij të armatosura kanë bllokuar përsëri Ngushticën e Hormuzit, një nga korridoret detare më kritike për trafikun ndërkombëtar të naftës.
Më herët, ushtria izraelite sulmoi Hezbollahun në Libanin jugor, duke iu përgjigjur sulmeve ndaj ushtarëve izraelitë të vendosur në atë rajon të Libanit, pavarësisht njoftimit të djeshëm të një marrëveshjeje armëpushimi.
Në një deklaratë, ushtria izraelite pretendon se Hezbollahu qëlloi më shumë se 50 raketa drejt forcave izraelite në Libanin jugor dhe në përgjigje, IDF po qëllon objektivat e organizatës pro-iraniane.
Po ashtu Ushtria libaneze njoftoi vdekjen e një ushtari libanez në Libanin jugor nga një sulm izraelit. Deputeti i Hezbollahut, Hassan Fadlallah, deklaroi se organizata ka të drejtë tu përgjigjet sulmeve izraelite.
“Ekziston një armëpushim. Për ne, ajo që ka rëndësi është që armiku ta respektojë plotësisht dhe në mënyrë universale armëpushimin dhe të mos përpiqet të sulmojë vendin dhe fshatrat tona, as të pushtojë pozicione të reja. Rezistenca ka të drejtë të përballet me këtë armik kur na sulmon, sepse është agresori dhe pushtuesi,” tha ai./Radar.al