Policia e Durrësit ka intensifikuar veprimet hetimore dhe operacionale për zbardhjen e rasteve të vjedhjeve me armë dhe me dhunë, duke finalizuar brenda 24 orëve dy operacione të koduara “Rada” dhe “Bashkëpunëtori”.
Si rezultat i operacioneve, janë identifikuar dhe arrestuar dy shtetas të dyshuar për përfshirje në ngjarje kriminale të ndodhura më herët, ndërsa janë sekuestruar edhe dy armë zjarri.
Në kuadër të operacionit “Rada”, shërbimet e DVP Durrës, në bashkëpunim me Komisariatin e Policisë Krujë, arrestuan shtetasin M.F., 21 vjeç, banues në fshatin Mafsheq. Ai dyshohet se më 19 qershor 2026, rreth orës 02:30, i maskuar dhe i armatosur me armë automatike, ka hyrë në oborrin e banesës së një shtetaseje në fshatin Radë me qëllim vjedhjen.
Gjatë ndërhyrjes policore në zonën e Krujës, i riu tentoi të largohej, por u neutralizua dhe u vu në pranga. Në kontrollin e banesës së tij, Policia gjeti dhe sekuestroi dy armë zjarri që do të përdoren si prova materiale në hetim.
Ndërkohë, në operacionin “Bashkëpunëtori”, u identifikua dhe u ndalua shtetasi R.K., 51 vjeç, banues në Tiranë. Sipas hetimeve, ai dyshohet se ka bashkëpunuar me shtetasin T.M., i arrestuar një ditë më parë në kuadër të operacionit “Taksimetri”, në dy raste grabitjeje me dhunë ndaj taksistëve në zonat e Shënvlashit dhe Rinasit.
Nga hetimet dhe analizimi i pamjeve filmike është dokumentuar se 51-vjeçari shërbente si transportues i bashkëpunëtorit të tij, i cili kryente grabitje ndaj drejtuesve të mjeteve taksi në qytete të ndryshme, përfshirë Tiranën, Krujën dhe Durrësin.
Gjatë kontrollit në banesën dhe garazhin e të ndaluarit, janë sekuestruar prova materiale që e lidhin me aktivitetin kriminal.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Durrës për veprime të mëtejshme hetimore.