Botërori 2026 ka nisur me polemika rreth uniformave, këtë herë me protagonistë kombëtaren e Egjiptit, të cilës FIFA i ka kërkuar të bëjë disa ndryshime në fanellat zyrtare.
Sipas raportimeve, qeveria e futbollit botëror ka kërkuar nga federata egjiptiane heqjen e yjeve nga logoja e ekipit dhe ndryshimin e ngjyrës së numrave në uniformë.
Fanella aktuale e Egjiptit përmban shtatë yje, që simbolizojnë titujt e fituar në Kupën e Kombeve të Afrikës në vitet 1957, 1959, 1986, 1998, 2006, 2008 dhe 2010. Megjithatë, FIFA ka vendosur se yje të tillë nuk mund të përdoren në fanellat e Botërorit, përveç rasteve të ekipeve që kanë fituar Kupën e Botës.
Një tjetër kërkesë lidhet me numrat e lojtarëve, të cilët aktualisht janë në ngjyrë të artë. FIFA argumenton se standardet e turneut kërkojnë dallueshmëri më të madhe vizuale për transmetimet televizive, duke kërkuar që numrat të jenë në ngjyrë të bardhë.
Federata Egjiptiane pritet të vendosë nëse do t’i përshtatet kërkesave të FIFA-s, ndërsa çështja ka hapur debat mes tifozëve dhe opinionit sportiv mbi rregullat e uniformave në kompeticionet ndërkombëtare.