TIRANË– Janë zbuluar detaje të reja në dritë sa i takon zhdukjes së 34-vjeçarit Eglant Koçi, për të cilin policia ka shpallur në kërkim si autor të dyshuar shokun e ngushtë, Armand Shakaj.
Burime bëjnë me dije se Shakaj për t’iu fshehur kontrolleve rutinë të policisë, ka përdorur një karrotrec për të transportuar automjetin e tij brenda të cilit dyshohet të ketë qenë edhe trupi i 34-vjeçarit deri në zonën e Ibës.
Ky veprim sipas hetuesve ka ndodhur në datën 6, që sipas kamerave të sigurisë, rezulton që trupi i Koçit rezulton të jetë mbajtur në makinë për 1 ditë e gjysmë pasi kontaktet e fundit i kishte me familjen në datën 4 qershor. Policia identifikoi pronarin e karrotrecit dhe e shoqëroi për ta marrë në pyetje.
Ai ka pohuar se automjeti e kishte lënë pranë një servisi në zonën e Ibës, pasi Shakaj i kishte thënë se makinën e kishte me defekt. Prej andej, thotë dëshmitari, nuk di më se çfarë ka ndodhur pasi është larguar dhe nuk kishte ide se çfarë kishte brenda në makinë.
Në ambientin e zyrës ku është mbajtur Koçi, janë gjetur mbetje baruti, por që grupi hetimor pret përgjigjen e ekspertizës për të përcaktuar çfarë ka ndodhur.
Prej ditësh policia është fokusuar në 2 drejtime kontrolli, së pari për të gjetur trupin e Eglant Koçit në rrethina të Tiranës, Elbasanit dhe Librazhdit si dhe gjetjen për arrestimit e autorit të dyshuar të shpallur në kërkim, Armand Shakaj. Burime të sigurta bëjnë me dije se 41-vjeçari, gjatë ditëve të fundit ka ndryshuar 6 numra celulari, në përpjekje për të mos u lokalizuar./Radar.al