Detaje të reja nga dosja hetimore hedhin dritë mbi ngjarjen e rëndë të 4 qershorit në malin e Bodes në Maliq, ku humbi jetën efektivi i njësisë “Shqiponjat”, Enea Mekolli, ndërsa u plagos rëndë kolegu i tij, Edison Adri.
Sipas dokumenteve hetimore, gjithçka ka nisur një ditë më parë, më 3 qershor, pas denoncimit të bërë në polici nga çobani Aleksandër Kola. Ai ka kallëzuar se ishte kërcënuar dhe dhunuar nga pronari i tij, i shpallur në kërkim, Violand Braçellari, i cili dyshohet se e kishte goditur me qytë arme në kokë.
Në dëshminë e tij, Kola ka deklaruar gjithashtu se kishte vënë re lëvizje të dyshimta dhe komunikime me telefon, që sipas tij shërbenin për të informuar të kërkuarin për lëvizjet e policisë, ndonëse nuk kishte mundur të identifikonte personat e përfshirë.
Pas këtij kallëzimi, më 4 qershor, çobani është marrë nga policia dhe është vendosur në dispozicion të hetimeve, duke u bërë pjesë e operacionit për lokalizimin e të kërkuarit.
Sipas dëshmive, forcat e policisë janë ndarë në dy grupe për të rrethuar zonën ku dyshohej se fshihej Braçellari. Një grup është nisur nga drejtimi i Voskopojës, ndërsa grupi tjetër, ku bënin pjesë edhe forcat “Shqiponja”, ka lëvizur nga zona e Lozhanit.
Hetimet tregojnë se grupi që lëvizte nga Voskopoja është përballur me vështirësi të mëdha për shkak të terrenit të thyer. Dy automjete nuk kanë arritur të afrohen pranë zonës së objektivit, ndërsa një tjetër është prishur gjatë rrugës, duke vonuar lëvizjen e forcave.
Në një distancë prej rreth 400–500 metrash nga stani, efektivët kanë dëgjuar të shtëna automatike dhe janë nisur me shpejtësi drejt vendngjarjes. Kur kanë mbërritur, kanë konstatuar se një punonjës policie kishte humbur jetën dhe një tjetër ishte plagosur rëndë.
Ndërkohë, i dyshuari kryesor, Violand Braçellari, akuzohet për disa vepra penale, përfshirë “vrasjen e punonjësve të Policisë së Shtetit”, “vrasjen e mbetur në tentativë ndaj punonjësve të policisë”, si dhe “mbajtjen pa leje dhe prodhimin e armëve dhe municionit”.
Autoritetet vijojnë hetimet për të zbardhur plotësisht dinamikën e operacionit dhe rrethanat që çuan në përplasjen fatale.