Detaje të reja kanë dalë nga hetimet për zhdukjen dhe vrasjen e dyshuar të 34-vjeçarit Eglant Koçi, i cili u pa për herë të fundit më 4 qershor teksa hynte në një zyrë në bulevardin “Zhan D’Ark” për të takuar mikun e tij, Armand Shakaj.
Sipas hetimeve, Koçi është filmuar nga kamerat e sigurisë duke hyrë në ambientet e zyrës, por nuk është regjistruar kurrë duke dalë prej saj. Pikërisht kjo, së bashku me gjurmët e gjakut dhe mbetjet biologjike të gjetura brenda zyrës, është kthyer në një nga provat kryesore që po drejton hetimin.
Dyshohet se pas krimit, Armand Shakaj ka ndërmarrë veprime për të fshehur gjurmët. Hetuesit kanë zbuluar se kamerat e korridoreve janë shkëputur, ndërsa më pas është ndërprerë edhe energjia elektrike në godinë, duke penguar regjistrimin e lëvizjeve që pasuan.
Sipas dosjes hetimore, Shakaj i ka kërkuar kamerierit të lokalit të tij, Enea Zyferi, të ndërpriste energjinë elektrike. Autoritetet dyshojnë se kjo është bërë për të mos u filmuar transportimi i trupit të 34-vjeçarit nga zyra drejt automjetit tip “Porsche”, i parkuar pranë pallatit.
Zyferi, i arrestuar si bashkëpunëtor, është lënë në burg nga Gjykata e Tiranës deri në përfundim të hetimeve. Para gjykatës ai ka deklaruar se nuk kishte dijeni për ngjarjen dhe se kishte zbatuar urdhrat e pronarit, pasi ishte informuar se do të transportohej një frigorifer.
Pas disa ditësh hetime intensive, policia lokalizoi automjetin e autorit të dyshuar. Në bagazhin e tij u gjetën materiale biologjike, të cilat janë dërguar për ekspertim laboratorik.
Një tjetër provë me rëndësi konsiderohet edhe motori i viktimës. Sipas hetuesve, pas krimit ai është zhvendosur fillimisht pranë Tregut Elektrik dhe më pas në zonën e “5 Majit”, ku u sekuestrua nga policia.
Tashmë, të gjitha provat e mbledhura në zyrë, automjet dhe motor janë dërguar në laboratorin shkencor, ndërsa ekspertizat pritet të japin përgjigje vendimtare për zbardhjen e plotë të ngjarjes.