Një operacion i gjerë i Policisë së Shtetit është zhvilluar që në orët e para të mëngjesit në qytetin e Vlorës dhe në disa zona të Lumit të Vlorës, me qëllim goditjen e veprimtarive të kundërligjshme.
Aksioni po drejtohet nga Drejtoria Vendore e Policisë Vlorë dhe, sipas burimeve paraprake, deri tani janë shoqëruar dhe ndaluar të paktën pesë persona. Gjatë kontrolleve të ushtruara në banesa dhe ambiente të ndryshme janë sekuestruar edhe armë, të cilat pritet t’i nënshtrohen ekspertizës përkatëse.
Forcat e policisë kanë kryer kontrolle në disa fshatra të zonës së Lumit të Vlorës, si dhe në pika të tjera të konsideruara me interes për hetimin. Megjithatë, autoritetet nuk kanë bërë ende publike detaje mbi veprat penale që po hetohen apo objektivin e plotë të operacionit.
Burime pranë hetimit bëjnë me dije se aksioni vijon ende në terren dhe nuk përjashtohen shoqërime apo ndalime të tjera gjatë orëve në vijim.
Policia pritet të publikojë një njoftim zyrtar pas përfundimit të operacionit, ku do të bëhen të ditura rezultatet e plota, numri i personave të përfshirë dhe materialet e sekuestruara.