Një studim i publikuar në revistën shkencore “Sleep Health” sugjeron se gjumi i shkurtër gjatë ditës mund të lidhet me një shëndet më të mirë të trurit dhe me ngadalësim të proceseve të plakjes cerebrale.
Studiuesit analizuan të dhëna nga rreth 379 mijë pjesëmarrës të databazës britanike “UK Biobank” dhe zbuluan se individët me predispozitë gjenetike për të bërë rregullisht një sy gjumë gjatë ditës kishin mesatarisht vëllim më të madh të trurit.
Sipas autorëve të studimit, kjo diferencë mund të korrespondojë me një tru biologjikisht 2,6 deri në 6,5 vite më të ri krahasuar me personat që nuk flenë zakonisht gjatë pasdites.
Për të minimizuar ndikimin e faktorëve të jashtëm si mosha, stili i jetesës apo gjendja shëndetësore, studiuesit përdorën një metodë gjenetike të njohur si “randomizimi Mendelian”, e cila ndihmon në vlerësimin e lidhjeve të mundshme shkak-pasojë mes zakoneve dhe rezultateve shëndetësore.
Megjithatë, ekspertët theksojnë se këto gjetje nuk provojnë përfundimisht se gjumi i pasdites përmirëson drejtpërdrejt shëndetin e trurit. Autorët e studimit nënvizojnë se nevojiten kërkime të mëtejshme për të konfirmuar rezultatet, pasi nuk janë marrë në konsideratë detaje si kohëzgjatja, frekuenca apo cilësia e gjumit gjatë ditës.
Studimi nuk gjeti një lidhje të qartë mes gjumit të pasdites dhe përmirësimit të funksioneve njohëse si kujtesa, koha e reagimit apo aftësitë mendore, duke sugjeruar se ndikimi mund të jetë më shumë strukturor sesa funksional.
Ndërkohë, studime të mëparshme kanë treguar se një sy gjumë i shkurtër prej 10 deri në 30 minutash mund të ndihmojë në rritjen e përqendrimit, vigjilencës dhe performancës mendore.
Nga ana tjetër, gjumi i zgjatur dhe i shpeshtë gjatë ditës mund të lidhet me probleme të tjera shëndetësore, përfshirë çrregullimet e gjumit, sëmundjet kardiovaskulare apo procese neurodegjenerative.
Ekspertët theksojnë se nevojiten kërkime shtesë për të kuptuar nëse gjumi i pasdites ka një efekt mbrojtës të drejtpërdrejtë mbi trurin, apo nëse ai është thjesht një tregues i faktorëve të tjerë të lidhur me plakjen e shëndetshme.