Sezoni turistik në Vlorë ka nisur me ritme pozitive, duke sjellë një numër të lartë vizitorësh, kryesisht të huaj, që në fund të muajit maj. Operatorët turistikë raportojnë një rritje të ndjeshme të prenotimeve dhe e konsiderojnë këtë një nga fillimet më të mira të viteve të fundit.
Sipas përfaqësuesve të sektorit, gjatë muajve mars, prill dhe maj, rreth 90% e turistëve kanë qenë të huaj, ndërsa rezervimet janë rritur me 25-30% krahasuar me të njëjtën periudhë të vitit të kaluar.
Një nga zhvillimet më të dukshme të këtij sezoni është shtimi i turistëve francezë, të cilët pritet të jenë të pranishëm në numër të madh përgjatë vijës bregdetare nga Vlora deri në Radhimë. Megjithatë, operatorët turistikë vijojnë të shprehin shqetësime lidhur me infrastrukturën, të cilën e konsiderojnë një sfidë për zhvillimin e mëtejshëm të turizmit.
Nga ana tjetër, hotelet që synojnë të operojnë gjatë gjithë vitit po arrijnë të zgjasin sezonin turistik për 7 deri në 8 muaj, duke mbajtur nivele të larta të frekuentimit. Menaxherët raportojnë se numri i pushuesve është rritur me rreth 35% në krahasim me vitin e kaluar.
Rritje të konsiderueshme ka pasur edhe nga tregjet nordike, veçanërisht nga Suedia, Norvegjia dhe Holanda, ndërsa turistët italianë, gjermanë dhe ata nga Kosova vazhdojnë të mbeten ndër grupet më të qëndrueshme të vizitorëve gjatë gjithë vitit.
Sipas operatorëve, një pjesë e turistëve që më parë zgjidhnin destinacione të tjera mesdhetare, këtë vit janë orientuar drejt Shqipërisë dhe Vlorës, duke ndikuar drejtpërdrejt në rritjen e fluksit turistik.
Aktualisht, plazhet e Vlorës janë të mbushura me vizitorë nga vende të ndryshme të botës, përfshirë Brazilin, Italinë, Moldavinë dhe Suedinë, të cilët shprehen të mahnitur nga bukuritë natyrore, deti dhe moti i favorshëm i zonës.