Një ngjarje e rëndë është regjistruar mëngjesin e kësaj të diele në zonën e Fllakës, në Sektor Rinia të Durrësit, ku një zjarr ka përfshirë ambientet e një magazine ku gatuhej ushqim për punonjësit.
Sipas informacionit paraprak, rreth orës 08:00 zjarri dyshohet se është shkaktuar nga një bombul gazi në ambientin e kuzhinës së subjektit me administrator shtetasin me inicialet S. M.
Si pasojë e flakëve ka humbur jetën një 25-vjeçar nga Bangladeshi, shtetasi me inicialet O. M., i cili dyshohet se ka ndërruar jetë nga asfiksia.
Ndërkohë, një tjetër punonjës, rreth 30 vjeç nga Kenia, me inicialet Ch. Ch., është transportuar në spital, ku po merr ndihmë mjekësore.
Policia dhe shërbimet zjarrfikëse mbërritën menjëherë në vendngjarje dhe bënë të mundur shuarjen e flakëve.
Grupi hetimor, nën drejtimin e Prokurorisë, po punon për zbardhjen e plotë të rrethanave dhe përcaktimin e shkakut të zjarrit.