TIRANË– Seriali shumë i dashur i Netflix-it, Emily in Paris, do të përfundojë zyrtarisht me sezonin e gjashtë.
Ky lajm është konfirmuar nga platforma e transmetimit, duke i dhënë fund spekulimeve mbi vazhdimësinë e historisë së Emily Cooper.
Krijuesi i serialit, Darren Star, falënderoi publikun për mbështetjen ndër vite dhe emocionet që seriali ka përcjellë.
“Faleminderit që na lejuat të bëhemi pjesë e jetës suaj, duke frymëzuar ëndrrat tuaja për udhëtime dhe dashurinë tuaj për Parisin.”– u shpreh ai.
Edhe protagonistja Lily Collins ndau një mesazh emocionues për fansat, duke treguar se ndihet mirënjohëse për gjashtë vitet e kaluara në rolin e Emily Cooper. Ajo premtoi se sezoni final do të sjellë gjithçka që publiku ka dashur nga seriali, duke e mbyllur historinë në mënyrë speciale. Seriali ndjek jetën e Emily-t, një drejtuese marketingu nga Chicago, e cila zhvendoset në Paris dhe përballet me sfida profesionale, histori dashurie, miqësi dhe botën magjepsëse të modës franceze. Që prej publikimit të parë, seriali është kthyer në një fenomen global, sidomos mes të rinjve dhe adhuruesve të modës.
Në sezonin final do të rikthehen edhe aktorët Ashley Park, Lucas Bravo, Lucien Laviscount, Samuel Arnold dhe Bruno Gouery. Netflix ka bërë të ditur se xhirimet kanë nisur në Greqi, ndërsa disa skena do të realizohen edhe në Paris dhe Monako. Deri tani, ende nuk është zbuluar data zyrtare e publikimit të sezonit të gjashtë./Radar.al