Bordi i Transparencës ka miratuar çmimet e reja të karburanteve në mbledhjen e datës 2 maj 2026, duke vendosur ulje për naftën dhe benzinën.
Sipas vendimit, çmimi maksimal i naftës (gazoil) në shitje me pakicë do të jetë 206 lekë për litër, ndërsa në shumicë 194 lekë për litër. Ndërkohë, benzina do të tregtohet deri në 184 lekë për litër në pakicë dhe 172 lekë për litër në shumicë.
Këto çmime kanë hyrë në fuqi që prej orës 16:00 të datës 2 maj dhe do të mbeten në fuqi deri në vendimin e radhës të Bordit. Autoritetet paralajmërojnë se çdo subjekt që nuk zbaton çmimet e përcaktuara do të përballet me masa, deri në pezullim të aktivitetit.
Institucionet përgjegjëse theksojnë se janë të angazhuara për mbrojtjen e konsumatorëve dhe garantimin e konkurrencës së ndershme në treg. Gjithashtu, bëhet me dije se çmimet aktuale janë nën kufijtë e përcaktuar nga akti normativ, ndaj akciza do të zbatohet në nivel të plotë.