Spartak Ngjela ka deklaruar se dashuria është ajo ndjenjë që të mban vazhdimisht në mendim personin që dashuron, duke theksuar se, sipas tij, “kur të dashuron dikush, gjithë ditën rri me mendimin tek ai”, dhe shtoi se këtë e lidh më shumë me burrin sesa me gruan, duke u shprehur se “vetëm burri e ka këtë, gruaja s’e ka”.
Ai është pyetur gjithashtu nëse i ka mbetur peng që nuk ka një fëmijë, dhe në përgjigje ka thënë se kjo lidhej me rrethanat e jetës së tij pas daljes nga burgu në moshën 40-vjeçare, duke shpjeguar se ndjehej i pasigurt për të ardhmen dhe mendonte se ekzistonte rreziku që mund të humbte jetën nga dita në ditë, prandaj nuk dëshironte që fëmijët e tij të mbeteshin jetimë.
“Herë pas here kam një konflikt të brendshëm, por kam edhe një ‘avokat’ brenda vetes. Pse? Sepse isha 40 vjeç kur dola nga burgu. Nuk ka grua që nuk dëshiron të martohet dhe të bëjë fëmijë. Si mund ta bëja unë një fëmijë, kur do të isha të paktën 42 vjeç? Nga kjo moshë e lart ekziston rreziku që mund të vdesësh në çdo moment. A duhej të lija një fëmijë jetim? E mendova si shkrimtar dhe si humanist”, u shpreh Ngjela.