Kryeministri Edi Rama, gjatë një takimi me operatorë të biznesit ushqimor, theksoi rëndësinë e garantimit të produkteve të sigurta për konsumatorët, duke e cilësuar sigurinë ushqimore si një prioritet absolut.
Ai u shpreh se standardet që do të zbatohen në vend do të jenë në përputhje me ato të Bashkimit Europian dhe se institucionet do të jenë në krah të sipërmarrësve për të arritur këtë objektiv, e jo përballë tyre. Sipas tij, kjo qasje synon të rrisë cilësinë e produkteve dhe besimin e qytetarëve.
Në fund të fjalës, Rama përcolli një mesazh reflektues duke sjellë në vëmendje një tregim nga Aleksandri i Madh. Ai rikujtoi porositë simbolike të tij para vdekjes, për të treguar se as pushteti, as pasuria dhe as aftësitë njerëzore nuk mund ta shmangin fundin e jetës.
“Po e mbyll duke treguar se çfarë u kërkoi Aleksandri i Madh atyre që kishte rrotull kur ishte në shtratin e vdekjes.
‘Do mblidhni mjekët më të mirë dhe do t’i vini të ecin pas arkivolit tim, mua do m’i lini duart hapur dhe rrugën deri te varri do ta shtroni me para. Njëri nga ata i thotë po për çfarë duhet t’i bëjmë këto? Sepse njerëzit i tha, duhet ta shohin që as njeriu më i fuqishëm mbi këtë tokë nuk i ikën dot vdekjes dhe doktorët më të mirë të kësaj tokë nuk kanë çfarë i bëjnë vdekjes. Dhe njeriu më i fuqishëm nga kjo tokë dhe kur ikën nuk ka asgjë në dorë, kthehet siç erdhi. Dhe njerëzit duhet të shohin që gjithë pasuria që mblidhet në këtë tokë, mbetet në këtë tokë’. Ndaj mendoni edhe për këtë, sepse jeta ikën shumë shpejt miqtë e mi”, tha Rama.