Autori i dyshuar i vrasjes së Faik Ajdinit në Memaliaj, rezulton se ishte në kërkim për trafik kokaine.
Blerti Kanushi strehohej prej disa muajsh në banesat e Skënderit dhe Bledarit, pasi ishte në kërkim nga policia për kultivim dhe trafikim kokaine, raporton Top Channel.
Pas debatit të ashpër për një vijë uji, Kanushi druhej se Ajdini mund të denonconte në polici vendndodhjen e tij.
Viktima prej kohësh nuk jetonte në fshat por ai udhëtonte çdo javë nga Tepelena për atje për të kontrolluar banesën dhe kopshtin.
Dinamika e krimit
Nga dinamika hetimore u konkludua se për shkak të konflikteve për motive të dobëta ndërmjet viktimës, shtetasit Faik Ajdini, dhe bashkëshortëve Skënder dhe Darovi Ajdini, këta të fundit kanë nxitur shtetasin Blerti Kanushi, 23 vjeç, i kanë krijuar kushtet dhe i kanë siguruar mjetet, për kryerjen e vrasjes.
Ky shtetas, në bashkëpunim me shtetasin Skënder Ajdini, më datë 19 gusht 2024, rreth orës 07:00 të mëngjesit, kanë kryer vrasjen me thikë të shtetasit Faik Ajdini. Më pas Blerti Kanushi është larguar nga vendi i ngjarjes. Pas kryerjes së krimit, Skëndër Ajdini me shtetasen Darovi Ajdini kanë kryer veprime aktive për pengimin e zbulimit të së vërtetës, duke bërë përpjekje për të zhdukur provat e krimit. Shtetasi Bledar Ajdini, në dijeni të plotë për krimin, ka përkrahur autorin e krimit. Duke mos informuar institucionet ligjzbatuese për vendndodhjen e tij.