Një fluturim i kompanisë Ryanair nga Katania drejt Athinës ka përjetuar momente tensioni mëngjesin e 10 prillit 2026, pasi avioni është detyruar të bëjë ulje emergjente pak minuta pas ngritjes.
Sipas raportimeve, avioni tip Boeing 737 është nisur nga aeroporti Catania-Fontanarossa Airport në orën 08:10, por gjatë fazës së ngjitjes është konstatuar një rënie e papritur e fuqisë së motorit, çka ka detyruar ekuipazhin të ndërpresë itinerarin dhe të ndryshojë kurs.
Pasagjerët kanë përjetuar ankth gjatë incidentit, ndërsa avioni ka qëndruar për rreth dy orë në manovra pritjeje në ajër, deri në përgatitjen e kushteve për ulje të sigurt.
Në orën 10:15, mjeti ajror është ulur në mënyrë emergjente në aeroportin e nisjes në Katania. Fatmirësisht, nuk raportohet për persona të lënduar.
Sipas mediave italiane, situata është shoqëruar me tension edhe në bord, ku është raportuar mungesë komunikimi të qartë nga ekuipazhi, ndërsa stafi i kabinës nuk ka pasur mbështetje të plotë gjuhësore në momentet kritike.
Pas uljes, avioni i është nënshtruar kontrolleve teknike për të përcaktuar shkakun e defektit, ndërsa disa pasagjerë kanë refuzuar të vazhdojnë udhëtimin me fluturimin zëvendësues të planifikuar nga kompania.