Një 51-vjeçar i shpallur në kërkim ndërkombëtar nga autoritetet italiane është arrestuar në Tiranë me qëllim ekstradimin drejt Italisë.
Shërbimet e Drejtorisë së Forcës së Posaçme Operacionale, në vijim të operacioneve për lokalizimin e personave në kërkim, finalizuan fazën e 90-të të operacionit të koduar “Operacionalja”, duke bërë të mundur kapjen e shtetasit Ylli Misku, 51 vjeç, banues në Tiranë.
Sipas Policisë së Shtetit, ai ishte shpallur në kërkim nga Interpol Roma, pasi Gjykata e Apelit në Bolonja, në korrik të vitit 2022, e ka dënuar me 5 vjet, 11 muaj e 14 ditë burg për veprat penale “trafikimi i lëndëve narkotike”, kryer në bashkëpunim, si dhe “vjedhje në rrethana rënduese”.
Arrestimi i tij është kryer me qëllim ekstradimin drejt Italisë, ndërsa pritet vijimi i procedurave mes autoriteteve shqiptare dhe atyre italiane për dorëzimin e 51-vjeçarit.