ITALI– Ish-futbollisti i Milanit, Aleksandre Pato, ka rrëfyer karrierën e tij në një intervistë të gjatë për “The Athletic”, duke folur për Karlo Ançelotin, periudhën te Milani dhe dëmtimet që ndikuan në rrugëtimin e tij.
“Në dhomat e zhveshjes, në të djathtën time ishte Paolo Maldini. Përballë shihja Kaka dhe Ronaldo Nazario. Ishte një skuadër legjendash. Ançeloti u tha të gjithëve të ngriheshin në këmbë kur hyra. Çdo lojtar erdhi të më përshëndeste. Mendova: ‘Uau, ky është respekt’. Mund të jesh lojtari më i mirë në botë, por duhet të mbetesh i përulur dhe të respektosh të tjerët”, kujton Pato për fillimet e tij në vitin 2007.
Duke folur për ambientin kuqezi, braziliani theksoi: Te Milani nuk bëhej fjalë vetëm për futboll, ishte një familje. Kjo është arsyeja pse ajo skuadër fitoi gjithçka. Nëse shikoje si stërviteshin, thoshe: ‘Duhet të bëj të njëjtën gjë.
Pato ndaloi edhe te presioni i madh në Brazil: “Kur je fëmijë në Brazil dhe bën diçka të veçantë, të quajnë ‘Pele i ri’ apo ‘Ronaldo i ri’. Kur erdha në Milano, thoshin: ‘Ky është Ronaldo i ri’. Por unë kurrë nuk jam ndjerë si ai. Thjesht stërvitesha sepse e doja futbollin dhe isha mes lojtarëve më të mirë në botë”.
Në fund, ai foli edhe për dëmtimet që shpesh i ndërprenë karrierën: “Dëmtimet janë një nga pjesët më të vështira të futbollit. Njerëzit shohin vetëm ndeshjen, por jo radhët e gjata të lojtarëve të dëmtuar që rikuperohen. E vetmja gjë që dëshiron është të rikthehesh në fushë. Pas të parit, pastaj të dytit dhe të tretit dëmtim, luaja dy ndeshje dhe lëndohesha sërish”./PanoramaSport