Kolegji i Posaçëm i Apelit ka rrëzuar 13 kërkesa për rishikim të paraqitura nga ish-gjyqtarë dhe ish-prokurorë të shkarkuar gjatë procesit të vettingut.
Këta të fundit kishin kërkuar rihapjen e çështjeve të tyre pa pritur vendimet nga Gjykata Evropiane e të Drejtave të Njeriut, duke u mbështetur në faktin se dy ish-anëtarë të KPA-së janë shpallur fajtorë nga drejtësia.
Nga 29 kërkesa të depozituara deri më tani, 13 prej tyre janë shqyrtuar në dhomë këshillimi dhe janë refuzuar nga trupat gjykuese të përbëra nga Ina Rama, Natasha Mulaj, Albana Shtylla, Mimoza Tasi, Rezarta Schuetz dhe Sokol Çomo.
Kërkesat e rrëzuara i përkasin:
- Alma Brati
- Arben Dollapaj
- Ardian Ylli
- Artan Madani
- Astrit Faqolli
- Bernina Kondi
- Bledar Abdullai
- Dritan Peka
- Dritan Rreshka
- Elsion Sadiku
- Entela Prifti
- Gentian Trenova
- Kastriot Gramshi
Vendimi i KPA-së konfirmon vijimin e një qëndrimi të fortë ndaj kërkesave për rihapje të proceseve të vettingut, duke lënë si rrugë kryesore për ankesa vetëm Strasburgun.