Policia greke ka parandaluar trafikimin e një sasie të madhe droge pranë kufirit mes Greqi dhe Shqipëri, duke arrestuar një 18-vjeçar grek gjatë një operacioni të zhvilluar mëngjesin e 16 marsit.
Sipas autoriteteve, operacioni u krye nga oficerët e Departamentit të Narkotikëve në Nëndrejtorinë e Hetimit të Krimeve në Igumenicë. I riu u ndalua në zonën e Sajadhë, pranë kufirit, teksa drejtonte një automjet të marrë me qira.
Gjatë kontrollit në makinë, policia zbuloi tre çanta të vendosura në bagazh dhe në sediljet e pasme. Brenda tyre u gjetën dhe u sekuestruan 55 pako me marijuanë, me një peshë totale prej rreth 60 kilogramë e 565 gramë.
Pas arrestimit, ndaj 18-vjeçarit është ngritur një dosje penale për trafikim dhe transportim të lëndëve narkotike.
Sipas të dhënave të policisë greke, që nga shtatori i vitit të kaluar janë sekuestruar rreth 835 kilogramë marijuanë që dyshohet se kishte origjinë nga Shqipëria. Rastet janë evidentuar kryesisht në Igumenicë, por edhe në qytete të tjera si Janinë, Selanik dhe Kostur, si në rrugë tokësore ashtu edhe në rrugë detare.