Pas konkurrimit në Lojërat Olimpike “Milano-Cortina 2026”, Lara Kolturi është rikthyer të përfaqësojë Shqipërinë në sezonin 2025-2026 të Kupës së Botës në ski alpine.
19-vjeçarja pati një fundjavë me konkurrim të dyfishtë në Are të Suedisë. Kolturi e nis të shtunën me disiplinën e sllallomit gjigant, duke treguar një formë shumë të mirë, të qenë pjesë në top-10. Skiatorja kuqezi regjistroi kohën e përgjithshme 2:24.91, duke u klasifikuar në vendin e shtatë. Në zbritjen e parë Lara u rendit e 10-ta, ndërsa në të dytën e 15- ta, duke e përfunduar kështu e shtata mbledhjen e dy kohëve. Triumfi në sllallomin gjigant i takoi austriakes Julia Sheib, ndërsa podiumi u plotësua nga amerikania Paula Moltzan dhe skiatorja e Zelandës së Re, Alis Robinson.
Më tej, të dielën ishte radha për sllallomin, disiplinën e preferuar të Larës. Vajza e talentuar piemonteze, e cila mbron ngjyrat e Shqipërisë, nuk arriti të shkonte më shumë se vendi i tetë në sllallom, teksa e ndali kronometrin në kohën 1:45.44. Në zbritjen e parë, Kolturi arriti 51.26 duke u renditur e gjashta, por në lëshimin e dytë paraqitja nuk ishte në lartësinë e duhur, pasi Lara përfundoi në vendin e 22-të me kohën 54.18, duke e mbyllur kështu garën me rezultatin total në vendin e tetë. Sllallomi në Are u fitua Mikaela Shifrin, e cila shënoi suksesin e 109-të në Kupën e Botës, triumfi i 72- të në sllallom dhe i teti sezonal në këtë disiplinë, duke barazuar rekordin e saj.
Për sa i përket klasifikimit të përgjithshëm të Kupës së Botës, amerikania Shifrin mbetet lidere me 1286 pikë, ndjekur nga gjermania Ema Aisher me 1146 pikë dhe Kamil Rast e Zvicrës me 989 pikë. Lara Kolturi pozicionohet në vend të 13-të me 535 pikë, por mbetet e para në renditjen e të rejave./PanoramaSport