Policia ka zbardhur detaje nga aksioni i zhvilluar në Shkodër, ku gjatë ndjekjes së një automjeti u raportuan të shtëna me armë zjarri.
Sipas njoftimit zyrtar, rreth orës 15:10, gjatë patrullimit në lagjen “Guerrile”, shërbimet e Policisë i kanë bërë shenjë ndalimi një automjeti ku udhëtonin dy persona, me qëllim kryerjen e kontrolleve rutinë. Drejtuesi i mjetit nuk i është bindur urdhrit të policisë, por ka shtuar shpejtësinë dhe ka kryer manovra të rrezikshme për t’u larguar.
Për këtë arsye, efektivët i janë vënë në ndjekje automjetit. Gjatë ndjekjes, dyshohet se pasagjeri ka qëlluar një herë në ajër me armë zjarri dhe më pas është larguar.
Policia ka arritur të kapë drejtuesin e automjetit, identiteti i të cilit nuk bëhet ende publik për shkak të konfidencialitetit të hetimeve. Ndërkohë, vijon puna intensive për lokalizimin dhe kapjen e pasagjerit të dyshuar.
Grupi hetimor, nën drejtimin e Prokurorisë, po punon për zbardhjen e plotë të rrethanave të këtij rasti.