Një program i ri pas-shkollor, i quajtur “Afterschool”, pritet të nisë si projekt pilot në 30 shkolla 9-vjeçare të Tiranës gjatë vitit të ardhshëm shkollor. Programi parashikon zgjatjen e qëndrimit të nxënësve në ambientet shkollore deri në orën 16:00 dhe ofrimin e drekës falas, të financuar nga Bashkia.
Sipas informacioneve të siguruara nga Top Channel, në listën e shkollave të përzgjedhura përfshihen institucione në qendër të kryeqytetit si “Emin Duraku”, “Konferenca e Pezës” dhe “Sabaudin Gabrani”, por edhe shkolla në zonat periferike si “Pal Engjëlli” dhe “Ibrahim Brahja”.
Programi do të përfshijë nxënësit nga klasa e parë deri në klasën e pestë dhe synon të ofrojë mbështetje arsimore shtesë pas përfundimit të mësimit zyrtar, duke lehtësuar njëkohësisht familjet që përballen me vështirësi për shkak të orareve të punës.
Shkollat janë përzgjedhur kryesisht mbi bazën e kushteve infrastrukturore, përfshirë rikonstruksionin dhe mundësinë për të ofruar ushqim brenda ambienteve shkollore. Prindërve u është shpërndarë një formular për të dhënë pëlqimin e tyre lidhur me pjesëmarrjen e fëmijëve në program. Në varësi të numrit të miratimeve, do të vendoset përfundimisht lista e shkollave që do të zbatojnë projektin.
Në kuadër të programit:
Nxënësit do të qëndrojnë në shkollë deri në orën 16:00;
Do të përfitojnë drekë pa pagesë, të mbuluar nga fondet e pushtetit lokal;
Aktivitetet do të zhvillohen në mjedise të sigurta, nën mbikëqyrjen e stafit arsimor.
“Afterschool” shihet si një vazhdim i konceptit “shkolla si qendër komunitare” dhe si përgjigje ndaj kërkesave të vazhdueshme të prindërve. Projekti është pjesë e programit qeverisës “Shqipëria 2030”, i cili synon zgjerimin e modelit të drekës falas në shkolla, të paktën në çdo bashki qendër qarku brenda mandatit të katërt të socialistëve.