Një 34-vjeçar nga Kosova është dënuar me burgim të përjetshëm nga Gjykata e Landit të Mynihut për tentativë vrasjeje ndaj bashkëshortes së tij të ndarë. Ngjarja e rëndë ndodhi në prill 2025, në një shesh lojërash në Mynih, në prani të djalit të tyre.
Sipas mediave gjermane, burri e sulmoi gruan me më shumë se 20 goditje me thikë, duke i shkaktuar plagë të rënda në disa organe jetike. Ajo arriti të mbijetojë falë një operacioni emergjent që zgjati pothuajse tetë orë.
Gjyqtarja kryesuese, Elisabeth Ehrl, theksoi se nuk kishte asnjë arsye për zbutje të dënimit, pasi sulmi u vlerësua si i paramenduar dhe i motivuar nga motive të ulëta. Sipas gjykatës, pretendimi i të pandehurit se thika ishte përdorur vetëm për ta frikësuar viktimën u konsiderua i pabazë.
Sulmi ndodhi pak para një seance të planifikuar divorci. Sipas hetimeve, motivi kryesor ishte mospranimi i ndarjes dhe zemërimi i tij për faktin se gruaja kishte denoncuar dhunë të përsëritur në familje.
Gjykata vlerësoi gjithashtu rëndë faktin që djali i çiftit ishte i pranishëm gjatë sulmit, duke theksuar pasojat e rënda psikologjike që ngjarja mund të ketë për të miturin. Çifti kishte pasur konflikte të vazhdueshme për çështje pronësie dhe kujdestarie.
Në përfundim të seancës, gjyqtarja Ehrl u bëri thirrje familjarëve të të dënuarit të tregojnë dhembshuri dhe t’i japin hapësirë viktimës për t’u rikuperuar, duke nënvizuar se akti i kryer kishte pasoja të thella jo vetëm për gruan, por edhe për fëmijën e tyre.
Vendimi nuk është ende përfundimtar. Të dyja palët kanë afat një javë për të paraqitur ankesë në Gjykata Federale e Drejtësisë.