Ish-ministri i Financave, Arben Malaj, ka rikthyer vëmendjen mbi praktikat tarifore të kompanisë ajrore Wizz Air në Shqipëri, duke i cilësuar ato si abuzive dhe penalizuese për konsumatorët. Sipas Malajt, kompania aplikon tarifa që rrisin ndjeshëm koston reale të udhëtimit dhe krijojnë një perceptim të rremë për çmimin final të biletës.
Ai përmend tarifën 48 euro për pasagjerët që nuk kryejnë check-in online, e cila përbën rreth 40 për qind të çmimit të biletës vajtje-ardhje, dhe tarifën 78 euro për një valixhe shtesë deri në 20 kilogramë, shpesh më e lartë se vetë çmimi i biletës. Malaj thekson se shërbimet online duhet të jenë opsion alternativ dhe jo mjet penalizimi, ndërsa mungesa e shërbimit të asistencës, veçanërisht në gjuhën shqipe, e bën situatën edhe më problematike për udhëtarët.
Ai thekson se këto praktika përbëjnë shkelje të të drejtave të konsumatorit dhe abuzim me pozitën dominuese në një treg me konkurrencë të kufizuar dhe ngre pyetje për mungesën e reagimit institucional nga Autoriteti i Konkurrencës dhe strukturat e Mbrojtjes së Konsumatorit.
Sipas Malajt, këto praktika nuk mund të konsiderohen thjesht politika tregtare agresive, por janë një dëm i drejtpërdrejtë për qytetarët shqiptarë, ndërsa Wizz Air ka treguesit më të ulët në TrustPilot për shkak të trajtimit të papërshtatshëm të pasagjerëve.