Një familje shqiptare ka nisur një apel publik për ndihmë, në përpjekje për t’i shpëtuar jetën një burri dhe babai të ri, i cili po përballet me një sëmundje shumë të rrallë dhe të rrezikshme të trurit.
Ylber Qenani vuan nga një malformacion arteriovenoz (MAV), një formë e komplikuar aneurizme, që në muajin dhjetor i shkaktoi një hemorragji cerebrale të rëndë. Si pasojë, gjendja e tij shëndetësore është përkeqësuar ndjeshëm, duke e lënë me pasoja serioze fizike dhe me vështirësi të mëdha në lëvizje.
Sipas familjarëve, në vendin ku ndodhen aktualisht, mjekët ofrojnë vetëm ndërhyrje kirurgjikale me rrezik shumë të lartë. Ndërkohë, në Spanjë ekziston një metodë më moderne dhe më e sigurt trajtimi, e cila i jep shpresë reale për jetë dhe rikuperim, por kostot janë të papërballueshme për familjen.
Pavarësisht gjendjes së rëndë shëndetësore, ai përpiqet të jetë pranë fëmijëve të tij, por situata po bëhet gjithnjë e më e vështirë. Vetëm së fundmi, ai është rrëzuar në banesë dhe bashkëshortja e tij ka pasur vështirësi ta ndihmojë të ngrihet, një tregues i qartë se koha nuk është në favor të tij.
Familja apelon për ndihmë financiare, duke theksuar se çdo kontribut, sado i vogël, është jetik për të siguruar trajtimin e nevojshëm jashtë vendit. Ata kërkojnë gjithashtu që apeli të shpërndahet sa më gjerësisht, në mënyrë që kjo histori të arrijë te sa më shumë njerëz.
“Po luftojmë jo vetëm për jetën e tij, por edhe për të ardhmen e fëmijëve të tij,” shprehen familjarët.