FIFA po përballet gjithnjë e më shumë me pakënaqësinë e tifozëve në prag të Kupës së Botës 2026, që do të zhvillohet në Shtetet e Bashkuara të Amerikës, Kanada dhe Meksikë. Pas debatit të fortë mbi çmimet e larta të biletave, ka dalë në pah një tjetër problem që ka shkaktuar reagime të shumta.
FIFA ka pranuar se nuk mund të ndërhyjë për të ndaluar rishitjen e biletave, pasi në SHBA një praktikë e tillë është e ligjshme. Megjithatë, kritikat janë shtuar edhe për shkak të kostove shtesë që po u ngarkohen tifozëve.
Sipas gazetarit Henry Bushnell të “The Athletic”, për herë të parë në historinë e Botërorëve, FIFA ka nisur të shesë edhe vendet e parkimit pranë stadiumeve ku do të zhvillohen ndeshjet.
Një vend parkimi pranë “SoFi Stadium” në Los Angeles po ofrohet me çmim që varion nga 250 deri në 300 dollarë amerikanë. Çmimi i lartë nuk është e vetmja arsye pakënaqësie, pasi tifozët ankohen edhe për distancën e madhe nga stadiumi, duke qenë se nga parkingu deri te impianti sportiv duhet të ecin rreth 1.5 kilometra.
Problemi lidhet edhe me faktin se në SHBA transporti publik nuk është aq i zhvilluar sa në Europë, duke i detyruar tifozët të përdorin automjetet private për të arritur në shumicën e stadiumeve.
Situata ka shtuar kritikat ndaj organizimit të Botërorit 2026, që po konsiderohet nga tifozët si një nga më të shtrenjtët në histori, jo vetëm për biletat, por edhe për shpenzimet anësore.