Komisioni i Verifikimit në Federatën Shqiptare të Futbollit ka zyrtarizuar kandidaturat për Presidentin dhe anëtarët e Komitetit Ekzekutiv, në kuadër të Asamblesë së Përgjithshme Zgjedhore të FSHF-së, që do të mbahet më 16 shkurt 2026.
Në mbledhjen e zhvilluar këtë të enjte, Komisioni – organi përgjegjës për garantimin e ligjshmërisë dhe integritetit të procesit zgjedhor – shqyrtoi propozimet e paraqitura nga anëtarët e Asamblesë, si dhe verifikoi përmbushjen e kritereve statutore dhe ligjore për kandidatët dhe delegatët.
Pas përfundimit të procesit të verifikimit, Komisioni konstatoi se 13 kandidatë për anëtarë të Komitetit Ekzekutiv kanë siguruar dy propozimet e nevojshme dhe plotësojnë kushtet për të qenë zyrtarisht pjesë e garës.
Kandidatët për Komitetin Ekzekutiv, sipas rendit alfabetik, janë: Abdyl Kuriu, Anila Basha, Arben Dervishaj, Armando Cungu, Blendi Fevziu, Edmond Hasanbelli, Envi Hicka, Erind Resuli, Ervin Canollari, Geri Çipi, Gjergji Petro, Lutfi Nuriu dhe Pano Xhixho.
Për postin e Presidentit të FSHF-së është regjistruar vetëm kandidatura e Armand Dukës, i propozuar nga 33 anëtarë të federatës.
Gjithashtu, Komisioni ka zyrtarizuar edhe listën e delegatëve që do të marrin pjesë në Asamblenë Zgjedhore, në përputhje me Vendimin Nr. 1, datë 03.12.2025, lidhur me numrin e delegatëve për secilin anëtar të federatës.
Asambleja e Përgjithshme Zgjedhore e FSHF-së do të zhvillohet më 16 shkurt në ambientet e “Shtëpisë së Futbollit”, ku do të zgjidhen Presidenti dhe anëtarët e Komitetit Ekzekutiv për mandatin e ri katërvjeçar.