Një ngjarje e rëndë ka tronditur opinionin publik në Maltë dhe më gjerë. Një vajzë 13-vjeçare nga Polonia humbi jetën pasi u rrëmbye nga dallgët e detit, teksa ndodhej me pushime së bashku me familjen e saj.
Sipas mediave të huaja, trupi i pajetë i të miturës u gjet mëngjesin e së mërkurës, pas tre ditësh kërkimesh intensive, në ujërat e Paradise Bay. Zbulimi u bë nga zhytësit e Mbrojtjes Civile, të angazhuar në operacionin e kërkimit.
Raportohet se një dallgë e fuqishme e tërhoqi vajzën në det, ndërsa babai dhe vëllai i saj u përplasën pas murit mbrojtës. Babai mbeti i lënduar gjatë përpjekjes për të shpëtuar të bijën, por pa mundur ta nxjerrë nga uji.
Menjëherë pas incidentit, autoritetet malteze nisën një operacion të gjerë kërkimi, ku u përfshinë ushtria, mbrojtja civile dhe policia, duke përdorur mjete detare dhe zhytës profesionistë.
Autoritetet kanë hapur një hetim për zbardhjen e plotë të rrethanave të ngjarjes, ndërsa familjes së viktimës po i ofrohet ndihmë psikologjike. Institucionet malteze u kanë bërë gjithashtu thirrje qytetarëve dhe turistëve të shmangin zonat e rrezikshme bregdetare gjatë motit të keq dhe detit të trazuar.