Kryeministri Edi Rama ka hedhur idenë e ngritjes së një grupi nismëtar për ndryshime kushtetuese, me fokus zvogëlimin e numrit të deputetëve në Kuvendin e Shqipërisë. Sipas tij, aktualisht parlamenti me 140 mandate mund të riformatohet në një përbërje më të reduktuar, me vetëm 100 deputetë.
Gjatë fjalës së tij, Rama theksoi se kjo çështje është ngritur që në fillim të mandatit dhe se një Kuvend më i vogël do të ishte më i pranueshëm për publikun, duke sjellë një përdorim më racional të forcave dhe burimeve.
“Duhet të mendohet edhe ngritja e një grupi nismëtar për ndryshimet kushtetuese. Kemi shtruar që në krye të këtij mandati nevojën që parlamenti të zvogëlohet në numër. Kemi një parlament me 140 deputetë dhe mund të kemi një me 100, gjë që do të mirëpritet nga publiku dhe do të racionalizojë forca dhe burime”, u shpreh Kryeministri.
Ai shtoi se përveç numrit të deputetëve, ka edhe aspekte të tjera të Kushtetutës që duhen rishikuar, duke theksuar nevojën për përfshirjen e ekspertëve dhe njohësve të fushës për të garantuar një proces serioz dhe të argumentuar të ndryshimeve kushtetuese.