Seanca paraprake në Gjykatën e Posaçme (GJKKO) për ish-presidentin Ilir Meta dhe ish-bashkëshorten e tij, Monika Kryemadhi, u shty ditën e sotme dhe do të vijojë më 22 janar.
Ilir Meta, i cili ndodhet në paraburgim prej më shumë se një viti, ishte i pranishëm në sallën e gjyqit, ashtu si edhe Monika Kryemadhi. Pas rreth 30 minutash zhvillim, trupi gjykues njoftoi shtyrjen e seancës.
Në nisje të seancës, Monika Kryemadhi u pa duke hyrë në ambientet e GJKKO-së e buzëqeshur përpara mediave, por pa dhënë asnjë prononcim. Ndërkohë, avokati i kreut të Partisë së Lirisë, Kujtim Cakrani, u shpreh shkurtimisht për gazetarët: “Shihem pas seancës”.
Ilir Meta ka kërkuar zëvendësimin e masës së sigurisë, ndërsa mbrojtja e tij ligjore argumenton se ka përfunduar afati maksimal i paraburgimit.