Ushtaraku shqiptar Dritan Goxhaj ka folur në Radar.al për NATO-n dhe rolin e Shteteve të Bashkuara të Amerikës në Aleancë. Ai tha se asnjë prej shteteve pjesëmarrëse në të nuk e ka ndikimin e SHBA-ve dhe praktikisht NATO ekziston vetëm prej SHBA-ve.
“NATO është një organizatë që është krijuar nga SHBA-të, drejtohet nga SHBA-të, mbahet nga SHBA-të dhe të gjithë pjesëtarët e tjerë në këtë organizatë janë thjesht vasalë të SHBA-ve dhe ushtarë të SHBA. Çdo lloj veprimi që ndodh në NATO që nga komanda qendrore që ndodhet në Belgjikë dhe është amerikane dhe është në bashkëpunim me komandën amerikane për Europën. Pra, janë në një godinë, janë të njëjtët komandantë, të njëjtët zyrtarë dhe çdo lloj dokumenti që prodhohet atje, prodhohet në anglisht dhe dokumentet e para që prodhohen kanë shënimin ‘nofor’, do të thotë ‘no for foreigns’, jo për të huaj dhe janë amerikanët që vendosin a do tua japin këto dokumente aleatëve të tjerë të NATO-s. NATO që kur është krijuar deri sot funksionon vetëm se aty janë amerikanët dhe e mbajnë amerikanët. Se del nesër Danimarka, apo se del Shqipëria kjo nuk e prish NATO-n. NATO-n e prish vetëm nëse prej NATO-s dalin amerikanët dhe nuk ka më NATO”, deklaroi ai.