Një aksident tragjik ka ndodhur këtë të premte në zonën malore Vajo Gabele, në Piccole Dolomiti, pranë Recoaros në provincën e Vicenzës, ku një alpinist italian ka humbur jetën pasi u përfshi nga një ortek bore.
Viktima është identifikuar si Massimiliano Ferru, 50 vjeç, banues në Venecia. Ai ndodhej në zbritje së bashku me një mik, kur një rrëshqitje e madhe bore e mori me vete për disa metra, duke i shkaktuar plagë fatale. Personi tjetër që e shoqëronte ka arritur të shpëtojë pa pësuar dëmtime.
Në vendngjarje ndërhynë menjëherë ekipet e emergjencës, të cilat përdorën helikopterë dhe mjete të specializuara për terren të vështirë për të arritur zonën. Pas lokalizimit, trupi i alpinistit u nxor dhe iu dorëzua autoriteteve për procedurat përkatëse.
Autoritetet lokale u kanë bërë thirrje alpinistëve dhe dashamirësve të sporteve malore të tregojnë kujdes maksimal, duke theksuar se kushtet atmosferike dhe rreziku i ortekëve vazhdojnë të jenë të larta në disa zona alpine.