Është ndarë nga jeta në moshën 64-vjeçare këngëtari i njohur kosovar Shemsi Krasniqi, i njohur gjerësisht nga publiku si Shemi i grupit legjendar “Ilirët”. Artisti është gjetur pa shenja jete, ndërsa lajmi i trishtë është konfirmuar nga mediat në Kosovë.
Shemsi Krasniqi ishte një nga figurat më përfaqësuese të muzikës shqiptare, një zë unik që la gjurmë të thella në historinë e këngës sonë. Ai do të mbahet mend veçanërisht si interpretuesi që i dha shpirt dhe identitet këngës ikonike “Xhamadani vija vija”, e cila u shndërrua ndër vite në një simbol kombëtar dhe u këndua brez pas brezi nga shqiptarët kudo.
Edhe pse deri më tani nuk janë bërë të ditura rrethanat e ndarjes së tij nga jeta, humbja e Shemit ka shkaktuar dhimbje të thellë te familjarët, miqtë, kolegët e skenës dhe adhuruesit e shumtë të muzikës së grupit “Ilirët”. Me ikjen e tij, muzika shqiptare humbet një nga zërat e saj më autentikë, ndërsa trashëgimia artistike që ai la pas do të mbetet e gjallë në kujtesën kolektive.