Aktori i njohur Viktor Zhusti ka reaguar publikisht në rrjetet sociale pas publikimit të një fotografie me kreun e lëvizjes “Shqipëria Bëhet”, Adriatik Lapaj, duke e akuzuar këtë të fundit për përdorim politik të një imazhi që, sipas tij, ishte realizuar vetëm për qëllime private.
Zhusti shprehet se fotoja ishte bërë me premtimin se nuk do të publikohej dhe se ai nuk kishte dhënë miratim për ta shoqëruar me mesazhe politike. Sipas aktorit, publikimi i saj e ka paraqitur padrejtësisht si mbështetës të kësaj force politike, duke i sjellë reagime negative, shqetësim dhe zhgënjim për shkak të shkeljes së besimit.
Aktori ka publikuar edhe mesazhe ku pretendon se i kishte kërkuar Gent Kames që fotoja të mos postohej, kërkesë për të cilën, sipas tij, kishte marrë garanci.
Në reagimin e tij, Zhusti thekson se nuk është dhe nuk ka qenë asnjëherë mbështetës i lëvizjes “Shqipëria Bëhet”, duke shtuar se Shqipëria, sipas bindjes së tij, mund të zhvillohet dhe europianizohet vetëm nga forca të tjera politike, ndaj të cilave kjo lëvizje mban qëndrim kundërshtues.
Pas reagimit të aktorit, ka ardhur edhe replika e Adriatik Lapajt, i cili i mohon akuzat dhe pretendon se Zhusti kishte dhënë vetë miratimin për publikimin e fotos. Lapaj shprehet se reagimi i aktorit lidhet më shumë me pasojat e krijuara nga reagimet publike sesa me veprimet e tij, duke shtuar se, për të shmangur më tej shqetësimet, ka vendosur ta heqë foton.
“Ndërgjegjja juaj e di që e vërteta është ndryshe”, shkruan Lapaj, duke përfunduar se mbetet i bindur në versionin e tij të ngjarjes.