Policia e Tiranës ka arrestuar në flagrancë një 24-vjeçar, i cili dyshohet se po transportonte një armë zjarri kallashnikov me municion luftarak, me qëllim shitjen. Arrestimi u krye në afërsi të terminalit të autobusëve, në rrugën “Kastriotët”.
I riu, banues në Bathore, u kap gjatë një operacioni policor të koduar “Luggage”, të zhvilluar nga shërbimet e Komisariatit të Policisë Nr. 3, në kuadër të goditjes së posedimit dhe tregtimit të kundërligjshëm të armëve të zjarrit.
Sipas policisë, arma e zjarrit dhe municioni u gjetën të fshehura në një valixhe udhëtimi, të cilën 24-vjeçari e mbante me vete në momentin e ndalimit. Arma u sekuestrua si provë materiale.
Materialet procedurale në lidhje me këtë rast i janë referuar Prokurorisë së Tiranës për veprime të mëtejshme ligjore.